సౌరభాల 'సంపంగి' పత్రికావనానికి సుస్వాగతం!

సాహితీ వినీలాకాశంలో సరస్వతీ అమ్మవారు మరో పత్రిక రూపంలో వెన్నెలలు వెదజల్లే జాబిలిగా ప్రభవించింది ఈ యుగాది శుభదినాన. ఆ పత్రికే,  'సంపంగి'.  పత్రిక పెడదామని శ్రీవారు, వరప్రసాదరావు గారు నిర్ణయం తీసుకోగానే, పత్రికకు ఆ పేరు స్ఫురించటం అది సర్వజనామోదం పొందటం  వెంటవెంటనే జరిగిపోయాయి. అది నా ఆరాధ్యదేవత ఆ అమ్మవారి అనుగ్రహం కాక ఇంకేమిటి? 

చంపకము లేదా సంపంగి అంటే అమ్మవారికి ఎంతో ప్రీతి. ఆవిడ అనుగ్రహంతో పుట్టిన ఈ పత్రికకు అంతకు మించిన పేరేం దొరుకుతుంది?

తుమ్మెద వాలని సంపంగి దేవతాపుష్పం! సాహిత్యంలో మకిలి అంటకుండా వచ్చే మన సంపంగి పత్రిక సరస్వతీ చరణారవింద సమర్పణం!

ఒక యజ్ఞంలా మొదలు పెట్టిన ఈ పత్రికకు నాతోపాటు శ్రీమతి నండూరిసుందరీ నాగమణి, శ్రీమతి గిరిజారాణి కలవల, శ్రీమతి లలిత గోవిందరాజు, శ్రీమతి దాసు శ్రీ హవిష, శ్రీ యష్ విహారి సహ ఋత్విక్కులు. ఫలితాన్నివ్వాల్సిన యజ్ఞ అధిదేవతలు మీరే - మానవరూపంలో ఉన్నారు! 

ఈ పత్రిక స్థాయిని దృష్టిలో పెట్టుకుని మంచి రచనలు, కథలు, కవితలు, వ్యాసాలు, నవలలు రచించి పంపండి.
మీ రచనలు పంపవలసిన చిరునామా:
sampangipatrika@gmail.com

సరస్వతి కరవది